Nkrataa ho nwoma

Yɛ faa nkrataa yi fri nwoma a ɛ di "Ma yensua Twi Kasa ne Amammerɛ"

AKƆMFƐM HO ASƐM

Akɔmfɛm yɛ anomaa anaa ntakraboa. Ɔka ntakraboa a nnipa hyɛ da yɛne wɔn wɔ fie no ho. Ebinom nso te wiram. Ntakraboa, a aka, a nnipa yɛne wɔn wɔ fie ne akokɔ, dabodabo ne kurokuro.

Akɔmfɛm yɛ aboa a, ne ho yɛ fɛ yie. Ne ho ntakra yɛ nsonso, ɛnna mfitamfitaa bi sisi mu fɛfɛfɛ.   Ɔte sɛ akokɔ, nanso akokɔ so kakra sene no. Ne nan yɛ atentene ne nhweahweaa kakra sene no. Ne nan ase nso yɛ kɔkɔɔ.

Akɔmfɛm tiri, ne ne kɔn susua sene akokɔ deɛ. Na ntakra bi wɔ ni tiri ho te s puaa. Abadeɛ no to nkosua te sɛ ntakraboa biara. Nanso ɔno mmom to nkosua bebree kyɛn akokɔ. 

Ɔyɛ aboa a ɔtaa to ne nkosua sie wiram.  Sɛ obi yɛne akɔmfɛm, na wanhwɛ yie a, berɛ biara, ɔbɛto ne nkosua no ago kwa. Ne wura no renhu.  Ne nkosua no yɛ nketewa sene akokɔ deɛ kakra, na ɛyɛ dene nso.

Ɔtaa tu kɔ akyiri sene akokɔ ne dabodabo.  Sɛ ɔhwane ne mma, na akorɔma kye bi a, ɔtumi tu di akorɔma no akyi. Wei nti akorɔma ntaa nkye akɔmfɛm mma.   Sɛ obi di n'akyi na ɔpɛ sɛ ɔkye no a, ɔtumi tu gya onii ko no hɔ. 

Akɔmfɛm yɛ aboa a, ɔsu sene ne nuanom ntakraboa a ɛwɔ fie nyinaa, na n'ano nso yɛ dene.  

Ɔsu sɛ : "Pɔkoa, pɔkoa, pokua".  Ɔdi aburoo ne aduane biara a akokɔ di.  Ghana ha, eserɛm a ɛyɛ Atifi, Atifi Apueeɛ, Afiti Atɔeɛ amantam mu titire na yɛhu wɔn. Ɛhɔ deɛ wodɔɔso nti, wɔn boɔ yɛ fo kakra.  Sɛ yɛde wɔn ba kwaeɛ m ha ne mpoano a, na wɔn boɔ ayɛ dene.

Akɔmfɛm mfoni na wohu wɔ krataafa a ɛdi kan hɔ no.  Woahu akɔmfɛm a ɔgyina hɔ anikan pɛn?